غرام الاسد الفصل السادس والثلاثون
بقلم شروق محمد
————-
في شركة أسد بعد ما الشركة رجعت تاني وبقت في حالة أحسن من قبل قعد حاتم مع عاصم وابتدوا يتكلموا مع بعض.
عاصم: يااااه اخيرا
حاتم: الحمد لله اخدت مننا وقت
عاصم: بس رجعت احسن من الاول
حاتم: اسد هيفرح اوووي
عاصم: زمانه قاعد جمب غرامه مش عاوز يقوم
حاتم بإبتسامه: مش قالك شيل عينك من عندهم
عاصم بإبتسامه: ربنا يهنيه المهم عاوزين نعملها مفاجئه ليه مع عيد ميلاده وكمان نتفق علي الفرح
حاتم بحزن: ربنا يسعدكم شوف هنعمل ايه وانا معاك
عاصم: بطل جنان احنا التلاته هنفرح سوا وسيب سلمي للبنات هيغيرو تفكيرها
حاتم: تفتكر هتغير رأيها
عاصم بإبتسامه: ياابني احنا اسمنا الثلاثي المرح والبنات اسمهم العصابه
تعالت صوت ضحكات حاتم وقال: انت حكايه ياعاصم
عاصم: اهي ضحكتك دي ياصاحبي بالدنيا
فضلوا يتكلموا ويضحكوا مع بعض وبعدها كل واحد راح بيته وانتهى اليوم من غير أي أحداث تذكر
————
في صباح يوم جديد على أبطالنا عاصم اتصل بهاجر وأبلغها إن سلمي عايزة تبعد عن حاتم ومصممه على قرارها وقال لها إنهم عايزين يقربوهم من بعض طلب من هاجر إنها تجيب سلمى على شركة أسد بأي طريقة ممكنة هاجر قالت لغرام واتفقوا يروحوا عند سلمى وبعد اعتراض كبير من أسد وإلحاح غرام الشديد وافق أسد على إنها تروح بس عشان يرجعوا سلمى لحاتم
—–
في بيت فاطمه
غرام: ياله ياسوسو تعالي معانا
سلمي: اجي معاكم فين
هاجر بإبتسامه: هنتخطف تاني
سلمي: الله يكون في عونك ياعاصم من جنان هاجر
هاجر: دا هو اللي علمني الجنان ياله يابت قومي
فاطمه: قومي معاهم ياسلمي
سلمي: هو انا اعرف رايحه فين
غرام: عاوزه انزل اجيب لبس وبصراحه بثق في زوقك
هاجر: ايوه وبصراحه حبيت المشي معاكم انتو الاتنين
بعد كلام كتير من غرام سلمى قامت ولبست هدومها عشان تخرج معاهم ونزلوا وراحوا لمول يشتروا فساتين غرام وهاجر اشتروا فساتين في غاية الروعة والجمال وأصروا على سلمى إنها كمان تاخد لنفسها فستان لكنها كانت رافضة بعد إلحاح شديد من غرام وهاجر وافقت في الآخر
غرام: دا حلو اوووي
سلمي: انا هجيب ليه مالهوش لازمه عندي
هاجر: انتي مالك احنا عاوزينك تجيبي
غرام: ياله بقي ادخلي البسيه كدا
بعد شوية سلمي لبست الفستان وطلعت ليهم وكلهم انبهروا بيه جدًا بعد ما خلصوا كل حاجة اتفقوا يروحوا على بيت غرام
