مراتي الثانيه بعد الحمل
مراتى التانيه بعد الحمل أمها تعبت والدكاتره قالوا انها ماتتحركش من السرير ومحتاجة حد يساعدها وانا فلوسى كلها بتروح على مراتى الحامل غزل تحاليل وفيتامينات ولبس المولود وبحهز للولاده ولو قولتلها مالناش دعوه بمامتك الزعل هيأثر على البيبي
وقتها فكرت اخد حماتى واوديها لمراتى الأولى تراعيها لحد ما غزل تخف وتقوم بالسلامه وتقدر توقف على رجلها وفى نفس الوقت حماتى تكون بقت حالتها افضل وتقدر تساعد بنتها بعد كده
وفعلاً روحت لفاتن
… وقولتلها بصراحة من غير ما ألف وأدور: “يا فاتن، إنتي كبيرة العيلة وست عاقلة وأنا ماليش غيرك يقف جنبى في الشدة دي. أم غزل مريضة جداً والدكاترة منعوها من الحركة، وغزل زي ما إنتي شايفه تعبانة في حملها ومحتاجة اللي يشيل عنها، وأنا مصاريفي كلها رايحه بسبب تجهيزات الولادة والتحاليل. أنا عاوز أجيب حماتي تقعد هنا عندك كام شهر، تراعيها وتاخدي بالك منها لحد ما الأمور تتظبط وغزل تقوم بالسلامة.”
فاتن سكتت لحظة، ونظراتها ليا كانت مخلوطة بذهول على غضب، وبعدين بصتلي وقالت بصوت هادي :
“يعني إنت يا سي السيد، عاوزني أخدم حمتك اللي هي أم ضرتي؟ إنت جاي تطلب مني أشيل شيلة غيري عشان إنت تريح نفسك وتوفر قرشين لمراتك التانية؟ إنت فاكرني إيه بالضبط؟”
حاولت أهديها وقولتلها: “يا فاتن افهميني، الموضوع إنساني خالص، وإنتي طول عمرك صيلة وبنت أصول، والزعل هناك ممكن يؤذي البيبي ويهدد حمل غزل، إنتي ترضي البيبي يجراله حاجة؟”
ضحكت ضحكة مكسورة وقالتلي: “ودلوقتي افتكرت الأصول والإنسانية؟ لما روحت اتجوزت وفضلت غيري عليا ما فكرتش في مشاعري ولا زعلي! ودلوقتي جاي تحملني هم فوق همي وعاوزني أكون الخدامة اللي بتراعي عيلة مراتك التانية عشان سيادتك خايف على مشاعرها؟ لو إنت راجل صاحب بيت، شيل مسؤوليتك بنفسك، يا تجيبلها حد يخدمها بفلوسك، يا تنزل إنت تخدمها، إنما أنا خط أحمر… أم ضرتك مش هتعتب باب البيت ده!” قصص وروايات أمانى سيد
وقفت مكاني مش عارف أرد، الكلام نزل عليا زي المية الساقعة، وحسيت إن كل الطرق اتقفلت في وشي،
ـ بصى يا فاتن انا مضطر اجيبها هنا لان مافيش مكان تانى اوديها ليه ومش معايا فلوس اجيبلها حد وبعدين غزل من اول الحمل وهى قعدت من الشغل فطبيعى اعوضها عن المرتب اللى قطع عنها
