غرام الاسد الفصل التاسع والعشرون
بقلم شروق محمد
غرام: خلاص ماشي هنزلك اهوه نروح البيت الأول وبعد كدا ننزل سوا
هاجر: طيب ياله انا مستنياكي تحت اهوه ولا اطلع
غرام: لا لو طلعتي هنتأخر وإحنا جاين ابقي اطلعي براحتك ثواني ونزلالك
غرام قفلت التليفون وراحت تستأذن منهم وقالت إنها هتروح مع هاجر مشوار تجيب حاجات ومش هتتأخر
سعد: حبيبتي خليكي هنا واسد يجيب اللي انتي عوزاه
غرام: لا ياعمو اسد كتر خيره والله يكون في عونه
سعاد: روحي حبيبتي وخدي بالك من نفسك
غرام: حاضر
غرام قربت من منال باستها وقالت لها: مش هغيب وهاجي علطول مشوار صغير بس وبعد كده غرام راحت قابلت هاجر وراحوا على بيت سعد غرام غيرت هدومها لفستان جميل وناعم زادها جمال وجاذبية بعدها خرجت من الأوضة
هاجر: واو ايه يابت الشياكه دي
غرام: بجد ياجوجو
هاجر: بجد جداااا
غرام: ربنا يخليكي ليا ياله بقي نروح نجيب الهديه ونروح لاسد
هاجر أخدت غرام وراحوا يشتروا الهدايا وبعدها راحوا على شركة أسد وبعد شوية وصلوا وطلعوا للطابق الأعلى.
غرام: بت ياجوجو انا قلب بيدق كدا ليه
هاجر: بيدق بيقول اسد اسد اسد
غرام: انا غلطانه اني بقؤلك اي حاجه بحس بيها
هاجر: خلاص ياقلبي اكيد بيدق من الفرحه
غرام: انا فعلا مبسوطه اووي
هاجر: ربنا يسعدك ويفرح قلبك دايما يامورا
غرام: حبيبتي ياجوجو انا بحبك اووي
هاجر: وانا اكتر ياروحي
غرام: ياله عاصم اهو طالع من مكتبه اجري بدل مايهرب منك
هاجر بإبتسامه: ماشي ياوحش واتفضلي انتي ادخلي للاسد
عاصم كان خارج من مكتبه عشان يروح مكتب أسد شاف غرام وهاجر فوقف وابتسم هاجر قربت منه وهي مبتسمة أما غرام ابتسمت لهم وراحت على مكتب أسد دخلت ووقفت مندهشة من اللي شافته
